Tuesday, January 1, 2008

KAVITA-KAVITA


Walmeeki ka hriday vedhkar
jab se footee hai kavita.
lakshya wohi hai, saadhan
saadhya, sadhnaa hi to hai kavita.
00000
antarman aanandit ho to
utsit hoti hai kavita.
antas ke adhron se sarki
viksit hoti hai kavita.
00000
Aisa aml ki pahan kar de-
taral, saral wo hai kavita.
antas ke ras boond-boond-
jo kar dale wo hai kavita.
00000
kavita bhasha hai, pravah hai
lay hai, jeevan hai kavita.
rodan, siskan, chhalkan,uljhan,
krandan, kilkan kavita.
00000
nav jaaye ka "amma-amma"
pratham rudan bhi hai kavita.
pratham aankh khulna jagtee me,
pratham srijan bhi hai kavita.
00000
haanth pasaare nibat maun me
antim yatra hai kavita.
shwet qufan hai kora kagaj
aatur likhne ko kavita.
00000
boorhe kaandhon par bete kee,
arthee hai nirmum kavita.
chund hawa ke qutre saansein,
jeevan kee sargam kavita.
00000
dhoop, deep, naivedya aarti
mun ka neeraajan kavita.
mun-paraayan,archan,vandun,
pooja, poojan hai kavita.
00000
chaahein hon shlok, chhund,
chaupaai, hon
dohe kavita.
Ishwar bhi upne archan me
sununa hi chahe kavita.
00000
kubhi kaanh kee makhan chori
khulna ban jaati kavita.
dadhi adharon par baal kanh ke
lugna ban jaati kavita.
00000
kaptee man ho, ganda ho ur
nahin nikal sakti kavita.
jamaa hua himkhandon sa man
nahin pighal sakti kavita.
00000
kavita to sursari hai shambhu
jataajoot lipti kavita.
kavita jeevan hai , bahti hai
sakal jaladhi bhee hai kavita.
00000
apna jaaya ho nichodta stan
ban jaati kavita.
kilkat kaanh ghuturuvan dhaavat
aangan ban jaati kavita.
00000
kabhee neend me thapkee maan kee
lori ban jaati kavita.
chandaa mama kee zid aur
chirauree ban jaati kavita.
00000
pardesi priytam kee smrita
aankhon se bahtee kavita.
bahut baar samjhaaya man ko
rah-rah kar siskee kavita
00000
madhushaala ka madhu kavita hai
aur nashaa bhee hai kavita.
hala, pyala, mabhubala,
madhushala ka sach hai kavita.
00000
kavita khinchtee hai khud me hee
madiraa see madhumay kavita.
anandon kee hai hilor
paavan paagalpan hai kavita.
00000
hriday adhar se jab bhee hai
matwaali pee jaati kavita.
jhoomkar-jhoomkar, naach-naachkar
sab kuchh kah jaati kavita.
00000

No comments: